Transkription

Wir ritter und knecht und stet, als wir hernach benennt sein, von erst Vlreich Nustorffer, Wolfhart von der Alben, Chünrat Wispekch, Jacob Turnär, Fridreich Zünngel, Vlreich von Weispriach, Nikla, Purkchhart, Asm von Weispriach, Hanns Laiminger, Vlreich der jung Velbär, Michel Hawnsperger, Charel Trawner, Albrecht Scheller, Hanns Trugsätzz, Wolfhart Überäkcher, Rüdolf Trawner, Chünrat Newnchirchär, Christan Nustorffer, Mertt von der Alben, Stephan Lampotinger, Fridreich Lampotinger, Mertt Hawnsperger, Fridreich Panichnär, Wilhalm von Wenns, Seybot Strüdel, Vlreich Strazzer, Harttel Aschacher, Jacob Strazzer, Gebhart Aschachär, Hainreich Strazzer, Pawl Gerspewnter, Hanns Schefherr, Engelprecht Gersteter, Chünrat Schefherr, Hanns Hunt, Winaber Jöchlinger, Ortolf Jöchlinger, Chünrat Graf von Schernperg, Chünrat Gräfenperger, Hanns Mosär, Rüpprecht Intzinger, Peter Golsär, Eberhart Jöchlinger, Hanns Tanhawsär, Ortolf Pawmburger, Seybot Noppinger, Hanns Hünnkerl, Härttel Zellär, Stephan Sittleinstorffer, Christan Täwsenperger, Jacob Gchürr, Wernhart Wärleich, Hanns där, Wolfhart Aufhaimer, Jacob Pettinger, und wir der richter, di purgermaister, die purger, reich und arm, der stat ze Lauffen, wir di purger, reich und arm, der stat ze Titmaning, wir di purger, reich und arm, der stat ze dem Hällein, wir di purger, reich und arm, der stat ze Rastat, bekennen für uns und für all unser eriben und tün chunt offenleich mit dem brief allen, den er fürkümpt, daz wir bedacht haben den grossen gewalt und unrecht, deu uns bischof Pilgreim und bischof Gregori sälig getan habent an lant und läuten, di seu beswärt habent mit gwalt wider recht, und hinfür von irn nachkömen geschehen möcht, von ersten, daz seu über grozz güt geben habent gein Rom dem pabst an unsern willen und wissen, damit seu sich in daz bistumb gesetzt habent, von dem daz bistumb in grozz geltschuld kömen ist, und darumb seu lant und läut und all stet swärleich wider recht und alteu gewonhait gesteurt habent; darzü habent seu nicht wellen leihen lehen den rechten eriben und habent dieselben lehen selber behalten oder zü frömden handen pracht; auch habent seu manigen man umb chlain sach oder an alleu schuld oft swärleich gevangen und beschätzt und habent auch etleich witiben und waysen beswärt mit gewalt an schuld und habent auch di verheyratt an irn und irer freunt willen; darzü habent seu uns nicht aus wellen richten lehen, gült und geltschuld und andrer vordrung, darumb man güt brief und weysung gehabt hat, an all ander grozz beswärung, di wir gehabt haben, di ze lank zeschreiben wärn. Und darumb, daz söleich grozz gewalt und verderben nicht mer geschech, daz daz gotzhaus, lant und läut, und wir pey wirden, rechten, ern und nützen peleiben, haben wir uns obgenant ritter und knecht und stet ainträchtichleich veraint, pey einander zepeleiben treuleich an alles gevär, an all auszüg, in der beschaiden: welicher chünftiger herr rechtleich eingeetzt wirt zü einem bischof, und den wir auch mit recht und mit ern aufgenemen mügen und süllen, denselben herren süllen wir pitten mit ganzem vleizz, daz er daz gotzhaus, lant und läut, ritter und knecht und stet, reich und arm, pey rechten, eren und nützen und pey alter, güter gewonhait halte und peleiben lazz. Und darumb begern wir von desselben herren gnaden, daz er uns dez versicher mit briefen für sich und sein nachkömen under seinem und dez capitels insigeln. Wär aber, daz derselb herr in denselben briefen ein verziehen hiet und uns der nicht geben wolt, so süllen und wellen wir all veraintleich mit einander im dhainerlay huldigung nicht tün, als verr wir mügen, üntz er uns di brief mit pünten, artikeln und sigeln richtichleichen antwurtt, als vor verschriben ist, und wann daz geschiecht, so sollen wir demselben herren huldigen, peystendig und gehorsam sein treuleich an allez gevär, als wir von recht und pilleichen tün süllen. Wolt aber derselb herr oder sein nachkömen jemant unpilleichen beswärn, so süllen wir all vorgenant ritter und knecht und stet denselben herren erpitten, monen und erweysen als lang, üntz er uns pey gnaden und rechten peleiben lazz. Wolt er sich aber nicht erweysen und erpitten lazzen, so begern wir, daz derselb herr darumb nidersetz sein ritter und knecht von dem land und purger von seinen steten und im darumb ein recht erkennen und ervinden lazz, wez man im umb den handel schuldig sey, und waz im daselben erfunden wirt, daz schol er dannoch nach gnaden nehmen; wolt er aber daz recht nicht erkennen lassen, so mügen wir denselben handel wol dahin pringen, da er von recht hin gehöret. Wir süllen uns auch in dez capitels wal jetzund und auch hinfür auf dhainen tail nicht legen mit räten noch mit hilf, durch dhainerlay gütz und versprechung willen, denn als vil, daz wir von dez gotzhauzz notturft wegen rechtleichen tün süllen. Daz di obverschriben ainung mit allen pünten und artikeln stät und unzerbrochen peleib, dez allez geben wir vorgenant ritter und knecht und stet disen brief zü einer zeuknüzz, versigelten mit unsern aigen anhangenden insigeln, darunder wir uns verpinden mit unsern treun und aiden, allez daz stät zehalten, daz der Brief lautt. So verpinden wir uns, Purkchhart, Nikla und Asm, di Weispriachär, mit unsern treun und aiden under unsers obgenanten lieben vettern, herr Vlreichs von Weispriach, insigel, allez daz stät und war zehalten, daz an dem rief begriffen ist, wann wir di zeit begrabner insigel nicht heten. Und welicher under uns allen rittern, knechten und steten und purgern, als wir oben benennt sein, desselben ausgieng, der hiet di pünt und artikel nicht gehalten, als vor verschriben und versprochen ist, dem möchten dann di andern wol darumb zusprechen und sind im hinfür dhainerlay dienst und fürdrung nicht mehr schuldig von dez puntz wegen. Auch ist zemerken: ob ains oder menigere insigel an den brief nicht chämen von den, die daran verschriben sind, dannoch sol der gegenwürtig brief pey seinen ganzen chreften peleiben. Der brief ist geben an sunntag vor unsers Herren aufferttag nach Christi gepürt vierzehenhundert jar darnach in dem dritten jare.

(Transkription und Übertragung in modernes Deutsch: Prof. Dr. Heinz Dopsch, Salzburg)